#ذكريات_طفولة

 زمان ونحن صغار لما كنا نلعبو ف الشارع ايام التشرد 

وقت كانت الدنيا بخير و نديرو الفلايط و الهل مايندرو ع شئ 

زمان الاهل مايشوفوش الا الكدمات و الجروح شن صار؟ عليش ؟ من من ؟

الله اعلم 

توا ببصاره و عائلات يتقاطعن و قطع ارحام و زعل .....الخ

المهم نبي نكتب حادثة تاريخية 

زمان كانت في بنت جارتنا اسمها نجوي الدعيكي بنت مزاط بكل و معبية شعر جسمها كله شعر كيف 

الغوريلا ، اكيد توا كبرت و دارت حلوي و قعدت طرف

المهم انه التمينا عليها كلنا بنات الشارع و دقيناها طريحة ف القايلة

القايله طبعا اجمل وقت حيث تكون الشوارع خالية و الاهل متمرقدين و حرية للاطفال

كانت الخطة تتضمن إستدراجها الي ورا جراجهم حيث بعيدا عن اهلها بالداخل و مكان آمن لا يتم فيه التدخل من قبل العدو "الكبار"

أستدرجناها و كانت لابسه شرت متاع بحر ملون شكلها كانت مزروبه تبي الحمام و جينا ف وقت غلط

شن كان سبب طريحتنا لها الله اعلم لكن كنا حاقدين بسبب فعلها لحاجة معفنة 

طلعتلنا و بدينا فيها طريحة و البنت تبكي و خناين و نكرولها ف شعر يديا كاين الجو تمام

الا ان نزل الشئ اللي اضطرينا فيه التوقف غصب خوفا ع سلامتنا و علي صحتنا

البنت ترت علي روحها يعني عبود براز ينزل م الشورت الملون

و يعععععع أقسم بالله اقرف شئ شفته ف طفولتي 

سيبناها اصلا قعدت تعيط و حد ناداها من هلها هربنا 

و بس =))))))))

#ذكري_قطية

نذكر مرة و القطاطيس عمرهن 3 شهور ف راسكو

ف اللي كنت انا واعية و صدام فوق ف داره 

كاين في حكية وكالهن شويه آني دك فيها راسه 

و قعد يخبط بيها و الحوش ناض 

طلعتله راسه رد دارها 3 مرات لين عزقت الحكيه بعيد

لا و مادا و نيمار يضربن ف الحكية و هوا محبوس جوا

#يومي

بسم الله الرحمن الرحيم و به نستعين

مدونتي العزيزية الوحيده اللي تسمع فيا بعد نحكي

20|فبراير|2015

اليوم نضت ع العصر متأخر و فاتني الظهر ربي يغفرلي

المهم صليت بعدها عديت درت توست كليت و كاين فيش نت

مديت وجي مع هلي 

لعند جت الساعه 10 هكي عديت انا و اختي نتفرجو ع تيمون و بوبا ف الدار اللي برا

نعست شويه بعدها نضت 11 تفرجت ع الزير سالم و كسدت يلا معاذ شويه 

شفت ملتقيات عنده و قعد يهدرزلنا بعدها خذيت اللاب و جيت للدار

درت برمه ع السوشل رقيتلي بكل ازح كلهم يحكو ع السياسه

كرهت النت بكل الواحد يبي يغير جوه ع النت يلقي النكد يرقصله ليش هكي

شن درتلهم انا 

و الله نفسيتي مدمرة قسم بالله

و توا ع اساس نبي نبدي قرايه بكرا يبو يجيبولي استمارتي و ان شاء الله يصير من تسجيلي

من انا ف الابتدائي كنت نخطط اني نقري ف العرب الطبيه 

من قال نجي لزليتن المعفنة الحمد لله ع كل و عسي ان تكرهو شيئا و هو خير لكم

لكن انا نسحابش ان دفعتي بدت اصلا و فجأة ف ثانيه تطلع دفعتي باديه و يقرو و توا معطلين و نا مادة زومتي ف الحوش

ربي يسخرلي اللي فيه الخير مالياش الا الدعاء

البدري خشيت للحمام حسيت قلبي ينخص فيا اقسم بالله الم فضيع

شريط حياتي مر بين عيوني 

نسأل الله أن يغفرلي و يرحمني برحمته الواسعة

#يومي 

19| فبراير|2015

يوم سامط جدا لا يحتوي ع اي جديد يوم بارد 

و الحمد لله ع كل حال اني مازلت عايشه 

و الحمد لله ع نعمه الاسلام 

و الحمد انولت مسلمه و بس خناص =))

#يومي 

يوم 18| فبراير|2015

نضت متأخر ع الظهر مشي الوقت بسرعة لعند العشيه 

باتي قبلها طلع عشان في قطعه ارض بيردوها بعدها رن ع اختي قاللها قولي لسومه توتي روحي

قلتلها وين قالتلي باتي ف الصبح حجزلك مستشفي انف و اذن و حجنرة 

لبست بالطو خديجه الجديد طلع عليا حلو و نزلت لباتي عديت 

حسيت روحي ثقلت ف الدبش و  حميت و بديت نعرق

وصلت للمستشفي قعد قريب 10 دقايق ع الرسبشن نستنو تقطعلنا طولت بكل 

بعدها ركبنا فوق في لافته كتوب عليا : ممنوع الوقوف في الممرات 

باتي سأل السستر قاللها فيش مكان نقعمزو شالتنا طبع باتي قعمز قريب

لكن انا ياما خشيت جوا لقيت غرفة الانتظار طبعا معبيه صبايا متخمرات أول ماخشيت كلهن يبحت فيا 

لكن بعد نبحت فيهن كيف اللي يخافن !!

مادورتهنش اصلا زغد =| راجيت واجد قريب النص ساعه بعدها نادو ع اسمي 

طبعا مش اسمي اسم اختي قالو خديجه سليمان 

نسحابه مش شوري اصلا لاهو اسمي لاهو اسم باتي هما خذو اسم جدي 

بعدها فطنت قلتلها انا 

عديت معاها و خطمت يلا باتي فطنلي جا معايا قبل نبيش يخش معايا للدكتور

اصلا بعد يخش معايا امي ولا باتي هما اللي يقعدو يحكو بلساني =| شئ مزعج 

المهم  خش معايا و الدكتور طلع شاب انحرجت 

قتلها شن مشكتلي بعدها طلب مني يكشف ع خشمي و قرب من وجي 

قاااااد وااات ذا فااااك 

كتبلي دواء و عندي مراجعه بعد 15 يوم 

و حسيته يدحنس واجد انتم شراقه و انا غالي عليا الشرقه 

ترار 

بعدها نزلنا ناخذو ف الدواء لقينا واحد ياخذ ف دواء لابس توته و كندر خشمها طوييل 

باتي وشوشلي قالي حقي كندرته

بعدها قعد يدوي معاه لاباس لاباس قالي عندي مغص

قال كان تحول الكندرة تو تصح

ههههههههههههههههه قعدت نضحك قدامهم معاش فيها

و قعدو يبحتو فينا بنظرة حقد

أيوه روحت درت دش و ماغسلتش شعري كالعادة =)))

و انخمدت 

#يومي

17\2\2014

مادرت شئ قعدت ف الحوش و نسمع ف الاحتفالات برا و خاطري نطلع و ماطلعتش 

يعني لا جديد مديت  وجي ع النت لعند الليل و كان الله يبقي الله

بس =))

ملاحظة : في ناس واجده نادمة ع ثورة 17 فبراير لكن
بالعكس تقعد ذكري جميله عندي مهما صار ف البلاد و مهما تغييرت 
لكن كانت شئ جميل جدا أول مره ف حياتي نحس بحرية 
مع اني كملتها ف الحوش وقتها حسيت أن بلادي فيها أمل 
شعور حسيت بيه رائع 
لا يعني أن أستغلال بعض الناس للثورة أن نكرهوها 
بس هيا ذكري جميله بس =))

#يومي 

بسم الله الرحمن الرحيم و به نستعين

ليا 3 ايام كتبتش شئ ف المدونه و في راسي نبي نكتب لكن ماسخرش ربي

المهم 

16\2\2015 عقاب اليوم هذك

أول أمس اللي نذكر ه اصلا من اول أمس اني مشيت لمستشفي عشان كنت مريضه لكن بديت نتحسن 

لكن باتي و امي اصرو عليا و اضطريت اني نعدي غصب

عديت مصحة زليتن مصحة صغيره بكل ماتصلحش تكون مصحة

طبعا خذيت بطاقه خديجه اختي عشان بطاقتي راحت ، نزلت انا و باتي للمصحة 

جينا للرسيبشن حجزنا #باطنيه و انا كنت نبي أنف و إذن و حجنرة لكن باتي اصر عليا و زاد ف الدوة،  مشيته

و قعدت نراجي 

طبعا هي عبارة عن ممر ضئ فيه كراسي من جهه وحده و الديار اللي فيهن الدكاتره مفتوحات من فوق و اصواتهن خاشات ع بعضهن

في دكتور يسأل ف عزوز قاللها برازك جيد أم فيه سهال 

ههههههههههههههههههههههه

عليك صماطه ازح ، لا وفي وحده طلعت م الدكتور الباطني اقسم بالله تقول لاعب سله لابس جلباب و خمار 😂😂😂

انا معاش قدرت نستطيع نتحمل بكيتها بضحكه يا إلهي 

و قعمزت يلايا وحده مشلاطه مزطتني ازح ايوه، قعدو ناس يخشو للباطني 

رقيتلي رنيت ع باتي قتله الموضوع كذا و كذا قالي هيا و روحنا 

بس روحت و طخيتها نومه نضت ثااني يوم الظهر 

إمسك بي إن أستطعت !

السينما هو مكان رائع لأخذ قسطا من الراحة من الحياة الواقعية ، 

و لكن في بعض الأحيان تكون أعظم الافلام علي الساحة ستتند علي وقائع حقيقية 

 الافلام الرائعة لا تحتاج دوما الي مشاهد اكشن عاليا الدقة أو مشاهد كوميدية مضحكة فوق العادة  

احيانا ،  مجرد إيصال الحقيقة يثير اهتمام المشاهد أكثر و يكون لها تأثير أكبر

تدور أحداث القصة عن فرانك أباغنيل  ، الذي أستطاع قبل أن يبلغ التاسع عشر من عمره 

تزوير شيكات تقدر قيمتها بملايين الدولارات و تظاهره كطيار، و كطبيب , و مدعي عام مما دفع  مكتب التحقيقيات الفيدرالية لملاحقته برئاسة كارل هانرتي

لاق الفيلم ناجحا واسع وحصل علي جائزتي أوسكار ورشح الي 22 جائزة أخري

الفيلم

هو احدي أفلام الجريمة الامريكية والسيرة الذاتية  لفرانك أباغنيل ، من بطولة المبدع ليوناردو دي كابريو بدور "فرانك"

و الرائع توم هانكس بدور "كارل هانرتي" هو عميل الـFBI الذي يُطارد فرانك طيلة أحداث الفيلم ، و من إخراج ستيفن سبيلبرغ .

عام 1963 في سن المراهقة كان يعيش مع والديه في نيو روشيل ، نيويورك مع (كريستوفر والكن) بدور والدهِ  و (ناتالي باي) بدور أمه بولا .

فرانك الفتي  يترك البيت بسبب طلاق والديه ومشاكلهما ،حيث أعتمد علي مهارته في تزوير شيكات وأدي نجاحة في كل مرة  دون كشفه ،إلي الحصول علي مايقارب 2.5 مليون دولار .

و في الوقت عينه كان كارل هانرتي نائب قسم الاحتيال المصرفي للـFBI ،قد بدأ بتتبع فرانك بعد أن التقي منهما الاخر في فندق وأقنع فرانك الأخر أن أسمه باري إلين من الخدمات السرية . حين يدرك كارل في اللحظة الاخيرة أن باري إلين 

. ومع مرور الوقت يُصبحُ أكثَرَ جُرأة فيقوم بتزوير بياناته لِصُبِحَ مٍاعدَ طيّار حيثُ سافر للكثير من المُدن بصورة غير قانونية، ثُمّ قام بتزوير شهادة طبيب وعَمِلَ لفترة كطبيب أطفال في إحدى المُستشفيات، وأخيراً، دخلَ سِلكَ المُحاماة واجتاز امتحان الأهلية وحصل على وظيفة المدعي العام. خلال عمليات التزوير نجد الضابط الفيدرالي كارل هنراتي يطارد فرانك في مطاردات دولية ولكنه يجد نفسه متأخرا خطوه عنه دائما. حتى يستطيع القبض عليه في فرنسا ويُحكم عليه بالسجن الانفرادي لـ12 سنة، ولكن تستخدم الـFBI سُلتطها للإفراج عنه وتُجبره للإنضمام والعمل لديهم في قسم مُكافحة جرائم الغش والتزوير.

#يومي

بسم الله الرحمن الرحيم و بيه نستعين 

اليوم 16\2\2015 الساعه 3 القايله

 ليا يومين مريضه و أمس الليل زادت حالتي حسيت براسي بيطير من مكانه

صداع ع خشم مسكر و سيلان خناين ع رقبه مسكره ع مافيش نفس ع حرارة الحكايه متخلطه

الحمد لله و بفضله لما نمرض او اصاب بأي سقم نتباعد عن الادوية و يقعد عندي ايمان تاام " وَإِذَا مَرِضْتُ فَهُوَ يَشْفِينِ "

المهم الحمد لله حاسه روحي بخير بفضل الله عز وجل

نبي نكتب شويه ع أمس 

أمس عديت لمصراته ف الصبح و كنت عالقه قبلها بيوم عشان باتي قالي و عطيته كلمه 

الزبدة عدينا الساعه 9 

أول حاجه صارتلي باتي نزل قبلي و بعدها نزلت قعدت ندور ف سيارة مالقيتاش دورته هوا مالقياتش رقالي الناس تبتحت فيا تقول شحاته 

بعدك عرب زليتن نقاارين بكل ازح ، المهم ركبت رنيت عليه و لقيته عدينا لمصراته 

وصلنا للمصرف قعدت نراجي ف باتي ف الشمس دخت و رقدت لين جا باتي نوضني

عدينا لمول الخير التجاري شكله غريب شرينا شويه حاجات و روحنا

انا انسانه نحس أن بكل بكل وجي نو ع كل حاجة قلت يستر الله مصراته ابصر شن يصير فيها

ماسكه ريقي ليا يوم كامل دفيتها نخامه قبل لا نروح

و نحن طالعين من مصراته صار حادث بطاح خاشه فيه سيارة متعجبنه تقول حكيه طماطم و دم و دنيا حايسه 

ربي يشفيه لو حي و يرحمة لو مات 

أيوه روحت دفيتها بنومه معاش نضت الا 11 الليل ع الزير سالم طبعا ، هجرس عرف روحه الجرو بن كليب 😂😂

مسكت روحي شويه بعدها فقدت قعدت نبكي وصلت للحظة نتخايل ف ايني يدحنس عليا بعد نمرض نحق فيه و يختفي 

ع الفجر هكي مسك روحي كسدت ع اللاب و نزلت فيديو بتاع "رساله موقعة بالدماء"

 =)) و بس 

#ذكريات_معفنة

بما أنِّ مش كل يوم نكتب 

ف البدري تذكرت حاجة حبيت نكتبها

خايفه من تكاثر الذكريات السيئة يمحنها 

و لا تصبح الا مجرد ملامح غريبه تمر 

زمان و نحن صغار تقريبا ف سادس و لا ف أولي اعداد

كنت مش متحجبه كنت صغييرة بكل

انا و اختي شالنا خويا الكبير لسرك

أيام كنا نسكنو ف شقه ف رويسات ايام كنا نسكنو ف بنغازي اصلا

الزبدة كنت لابسه اخضر فاتح ههههههههههه و حق ربي يوم دفنقي بكل

عدينا للسرك و قبلها خويا شالنا لفندق تبستي ايام كان فندق اصلا قبل لا يدمر 

كان اعلي مكان ف بنغازي تشوفي منه بنغازي كله

صح البنه معفنه لكن منظر ولا اروع

نذكر خذالنا م المطعم جولاطي و لا هو سنترا

و الاصنصير يجنن يلمع مش زي اصانصير عمارتها يعبو شخاخات العيال الصغار

المهم السرك مش عارفه بوه من وين جايبينه المهم انه اجنبي

هههههههههههههه بلا خويا كاين عنده تلفون n75 حي ع ام العجاج

المهم اول ماخششوا الفيل قعدو يضربو فيه مابش يتحرك

يمشي يعدي دفه لهم تره كبيييييرة 

بلااااااا و الله مازلت نذكر شالوها ف برويطتين 

ههههههههه عليك قر اقسم بالله 

و مكتوب لاوره ممنوع التصوير و خويا قعد يصور و جو سمح 

هههههههههه عليك دفنقي اقسم بالله

و قعدت نفشك علي بنات المدرسة بعد روحت لراس لانوف 

حظرت سيرك ما سيرك 

و حق ربي اتفوو ع وجي 

ههههههههه معقوله انفشك بحاجة زي هكي 

#ذكري_قطية

في أغنية ألفتها ع قطاطيسي ربي يحميهن 

كتبتها ف حلاق ف المنطرحة ف زليتن و الضئ كاين مقطوع و ع الفجر

الزبدة

من يعرف كيف يكون ؟ مادا بين الناس ؟

و لا رقط وين تنسرف قاعدز !

من يحلم بميغو تجريله 6 فروخ

و لا ضرطة حسو تقتل حفاترة !!

تخيل أن آنيي قاعد ف الحوشي 

أو أن نيمار يستف ف الاقلام !

هذا محال أيني ف الميدان

 ليأكلوا جوبينة أو تن ف الجنان

محال قاعدات راقدات 

في دار المقعد و لا حتي ف الحمام

لا تنسي أنهن قطاطيسنا 

لا تنسي أنهن قطاطيسنا 

#يومي

بسم الله

قلت  نفتح المدونه نكتب شويه ع حالي

نبي نحرك صوابعي

بديت ننسي حتي ف مكان الحروف مرات

سبحانه الله كنت سريعه بكل

آنايواي :3 اليوم 15\2|2015

قاعده في الصاله حاطه ع باب الحارة و باتي ع يميني يجخخر و امي ع يساري راقده

و نسمع ف الاقامة متاع الفجر مع اني ماسمعتش الاذان

توا مفروض نصبي نصلي لكن لو صبيت ف الثانيه هذي مش حنرد نكتب اصلا ="))

لكن حنلحقق =P

نبي نكتب شويه ع شخصيتي

انا انسانه غريبه جدا جدا جدا

محد فهمني و لا انا اساسا فاهمه روحي

مرات نحس روحي اجتماعيه و نفهم ف الجوو نخالط ف الناس لكن بعد نقعد مع الناس نفسهم

نحس روحي مهمشه جدا يمكن انا مهمشه روحي بطريقه ما لكن الله أعلم

انا جايه عقاب عمري و نبي نفهم روحي شئ غبي جدا

بعد خطرها حلو الفضفضة في مدونه

مش موضوعي

- نحس ف دماغي مشاركيني فيه اشباح او جنون

في ناس تفكر و تاخذ و تعطي معايا لما نفكر

أشعر بأنني علي حافه الجنون

مرات مرات نبي نكون جرافيك ديزاينر و نبي نتعلم ع منتجات ادوبي كلهن

لكن انا الفوتوشوب بروحه نلبز فيه تلبيز

و مرات نحس روحي نبي نقعد مصممه ازياء لاني شاطره ف الخياطه

و نحب  نجيب افكار لكن هلي حطموني واجد من ناحيه الموضوع هذا

و اصلا انا مش هذكي الشغل اللي نشتغل فيه "أعتراف"

مرات نحس ف روحي نبي نقعد طباخه

لو حد من هلي يقري الكلام هذا حيقول انتي اكبر كذابه

لكن بجد و الله و أول مره نعترف بيها لروحي لما نطيب حاجة و تجي سمحه و في اغلب الاحيان يحبو اكلي

نحس بشعور اني نبي نقعد شيف و نشتغل ف مطعم لكن الشئ هذا مستبعد جدا

حتي لو اسكرت الدنيا ف وجي

و مرات نحس ف روحي مانبيش نقري و نبي ندرب ع السلاح و نقاتل

قصدي حتي هيا مستبعده لكن نبي نضيف لقائمة 100 thing that i'll do be4 I die نتعلم التقنيص بالدراجنوف

مرات نحس ف روحي نبي نقعد سنقر صح صوتي معفن لكن مرات يعجب فيا

لكن ف النهاية حرام ساد اني نغني نزيد الطين بله و نقعد سنقر

نووووووي مستبعد جدا جدا

و مرات يزن ف راسي نبي نتعلم هكر و نشتغل شغل مخابرات و كلام كبير "جو أفلام"

و الفتره الاخيره ضاربه ف راسي نفتح كوفير نبي نقعد ميك آب ارتست ليش لا

و انا كل يوم نلبز و نتعلم

و في مرات نرسم لكن رسمي مزفت جدا

طبعا مهنتي المستقبلية دكتوره بإذن لله حلم و أتمني من الله عز وجل ان يتحقق هالحلم

أشعر بتناقض كبير دماغي يعج بمخيلات و الترعهات و القطاف الفاضي

في حاجات واجد يزن في راسي لكن توا ماجمعت الا هذينا 

وفي شئ نبي نعترف بيه قبل لا نعدي للتدوينة الجاية

أفتقر للتنسيق في حياتي

لا يعني هذا اني مسردنه لكن كل شئ ندير فيه لقطه غلط و وين مش عارفه

علي كلٍ

سيي يو ماي بول شيت